Moris zwir enn diversite kiltirel e artistik inik, ki reflet dan so bann expresion artistik, depi lamizik ziska teat, lapintir, ladans ek lar viziel. Par kont, malgre sa rises artistik-la, bann artis morisien rankont touzour bann obstak ki anpes zot devlopman. Mank lespas dedie a bann artis (stidio, galeri, lasal repetision, lasal konser…etc.) li enn obstak pou boukou. Bann artis souvan fer fas a bann kou ser pou lwe bann landrwa, seki konplik zot pratik ek anpes zot devlopman kreatif. Akoz mank bann striktir formel pou promosion ek lavant bann travay artistik, bann artis souvan bizin tourn ver bann platform informel, souvan malintansione, ki kapav zer zot travay. Bann program sibvansion ek soutien pou bann artis res limite. Mem si finn donn linpresion ki sertin linisiativ pe pran pou promouvwar kiltir, sa bann zefor-la pa sifizan e defwa mal distribie. Sa kre enn santiman fristrasion ek abandon parmi bann artis, ki santi zot ankor enn fwa izole dan zot bann zefor. Bann artis zwe enn rol vital pou prezerv ek promouvwar kiltir morisien. Boukou fer fas a bann defi ki afekte pa zis zot karyer me osi zot bienet sikolozik, sosial ek ekonomik. Boukou artis pe soufer insekirite ekonomik persistan, souvan zot pa gagn ase lapey pou zot travay. Reveni ki lar (lamizik, lapintir, teat, etc.) zenere pa touletan ase pou satisfer zot bann bezwin. Mank kontra formel ou reminerasion stab kree enn insertitid finansie konstan. Bizin kone osi ki boukou artis pena akse a bann proteksion sosial (lasirans lasante, retret, etc.), seki met zot dan enn pozision preker, partikilierman fas a bann evennman inprevi kouma maladi ou bann peryod kriz, kouma pandemi. Covid-19 finn partikilierman afekte sekter artistik, avek anilasion boukou evennman kiltirel, festival, ek exibision. Bann artis, ki ti deza dan enn sitiasion preker, finn trouv zot reveni diminie drastikman, seki finn agrav zot malet. Fermtir bann lespas piblik e sispansion bann spektak finn amenn izolasion sosial pou bann artis. Mank interaksion avek piblik finn ena enn lefe negatif lor zot moral, parski boukou parmi zot tir zot lenerzi kreatif depi sa bann interaksion-la. Kouma dan boukou profesion kreatif, bann artis souvan sibir enn presion emosionel. Solitid, insertitid lor lavenir, ek nesesite konstan pou re-invant noumem kapav amenn traka ek mem bann leta depresif. E sa size-la li ankor tabou dan Moris. Bann artis kapav osi santi enn pert motivasion fas a enn mank rekonesans ouswa perspektiv pou progresion. La pratik enn profesion artistik souvan stigmatize dan Moris, sirtou dan bann fami kot bann karyer pli konvansionel (avoka, dokter, inzenier, etc.) favorize. Sa stigmatizasion-la kapav amenn enn pert konfians de lartis ek enn santiman ki pa pe pran li oserye. Sosiete morisien, malgre so latasman ar kiltir, bien rar valoriz travay bann artis a so zist valer. Lar souvan konsidere kouma enn aktivite lwazir, enn pastan, plito ki enn vre metie, seki amenn marzinalizasion bann artis. Malez bann artis morisien se enn vre size ki revini dan bann diskision lor lindistri kreatif e ki nou bizin ariv fer sanze pou evolision nou kondision dartis.
Commentaires